3 мамыр күні "Адай ата - Отпан тау" кешенінде Ұлы Жеңістің 80 жылдығына орай майдангер жерлестеріміз Шалабаев Әбдірахман және ағайынды Ізтұрған мен Байтұрған Меңдіқұловтарға арналған "Отан үшін от кешкендер" атты дәстүрлі шара болып өтті. Шараға марқұм болған майдангерлердің ұрпақтары: ұл-қыздары, немерелері мен жиендері қатысты.

Шараны кешен қызметкерлері Гүлбану Шораева мен Талант Тайман жүргізді. Кездесу-шара барысында Таушық мәдениет үйі мен кешен қызметкерлерінің сахналауымен кешен қызметкері Н.Түркпенбаеваның "Қаралы жылдар қасіреті" атты драмалық қойылымынан үзінді көрсетілді. Майдангерлердің ұрпақтары әкелері туралы естеліктерін айтса, немерелері мен жиендерінің бірі аталары шығарған өлеңдерді оқыса, бірі аталарына арнап жазған жүрекжарды шығармаларын көпшілік алдында паш етті. Енді бірі сахнада мың бұрала билесе, бірі тақпақ оқыды. Майдангерлердің ұрпақтары шараны ұйымдастырушы кешен қызметкері Маржан Нарешеваға мен кәсіпорын директоры Ж.Кетееваға ризалықтарын білдіріп сый жасаса, оларға ел үшін, жер үшін қан төккен аталарды еске алып, дәріптеуде белсенділік танытқандары үшін кәсіпорын басшылығы атынан алғыс хат табысталды.

Шара соңынан майдангерлерге арнап ұрпақтарының ұйымдастыруымен және кешен қызметкерлерінің атсалысуымен ас берілді.