«Жыр жебе» – Адай атада!

24 сәуірде «Адай ата – Отпан тау» тарихи этно-мәдени кешенінде дәстүрлі «Ағадан – алғыс, атадан – бата» атты ақындармен кездесу болып өтті. Шараға Ақтау қаласындағы «Жыр жебе» айтыскер ақындар мектебінің түлектері мен Ақтау қаласы № 8 орта мектеп оқушылары қатысты. Шараның мақсаты: жас ақындарды тәжірибелі ақындардың алдарына шығарып, шабыстарын байқап, ақыл-кеңестерін беріп, болашақ өмірге қолдау боларға бата беру, сонымен қатар айтыс өнерін насихаттау.
Соңғы жылдары ақын Фархад Мусаев Ақтау қаласынан облыстық мәдениет басқармасының қолдауымен «ЖЫР ЖЕБЕ» атты айтыскер ақындар мектебін ашып, шәкірт тәрбиелеп келеді. Олардың бірқатары облыстық, республикалық айтыстарда жеңімпаз, жүлдегер атанып, облысымызға олжамен оралып жүр. (Тіпті жақында сәуір айында Алматыда болған республикалық "Ұлы дала дарындары" атты өнерпаздар байқауында мектеп түлегі Мейірбек Саламатов 1-орын иемденіп, Т.Жүргенов атындағы өнер академиясының оқу грантын жеңіп алды). Олар: Жұмабай Мағжан Аманкелдіұлы, Саламатов Мейірбек Жәумітұлы, Сүйемов Алшын Қанбергенұлы, Сардар Ердәулет Бердіxанұлы, Қуаныш Жолдас, Қайырбек Теңел. Ақындар «құлмамбет айтыс» түрімен кезектесіп айтысып, шараға қатысушыларды бір сілкінтіп тастады.
Ақындардың қатарында Адайдың жеті қайқысы Өскембай Қалмамбетұлының ұрпағы Қайырбек Теңел мен Қуаныш Жолдас – Маңғыстау өнер колледжінің жыр-терме бөлімінің студенттері. Соларды кезек-кезек жырлатып, күй тартқызып, жыршы-күйшілердің сұлу сөздері мен күмбірлеген күйлерін тыңдап, қатысушылар бір марқайып қалды.
Ақындар мен жыршылардың жырынан шабыты оянған И.Сүйеубаев атындағы мектептің 9-сынып оқушысы, «Сазген» өнер мектебінің түлегі Рақымжан Жаңабаев өзі сұранып, көрермендер алдына шығып жырдан шашу шашты.
Шара дәстүрі бойынша қарт ақын жас жүйріктерге бата беруі тиіс болатын. Алайда шараға арнайы шақырылған ақын денсаулығына байланысты кездесуге келе алмағандықтан, бұрынғылардың жолымен деп шараны жүргізуші, көпшілік-экскурсия бөлімінің меңгерушісі Жомарт Айдарбек жас жүйріктерге ағалық ақ батасын берді.
Кәсіпорын атынан айтыскер ақындарға естелікке өткен ғасырлардағы маңғыстаулық ақын-жыраулардың жыр жинақтары тарту етілді.