Темірмен тіл табысқан

Жақында «Отпан» тарихи-мәдени кешенінде «Темірмен тіл табысқан» деп аталатын түркі әлеміне танымал ағайынды ұсталар, ҚР мәдениет қайраткерлері, "Түрік дүниесі алдындағы сіңірген еңбегі үшін" халықаралық сыйлығының иелері Тұрсынжан, Махмұт, Айтберген Құлменовтердің қолдарынан шыққан сирек қолөнер бұйымдарының көрмесі өтті. Көрмеге Құлменовтердің ортаншысы Махмут пен қасиетті ата кәсіпті жалғастырып жүрген Айтберген ұлы Алмас және Маңғыстау өнер колледжінің студенттері мен Тұщыбек негізгі орта мектебінің оқушылары, ұстаздары, жергілікті шеберлер, саятшы, құсбегілер, өнертанушылар қатысты. Көрмені ұйымдастырушы, кәсіпорын тарих бөлімінің меңгерушісі Құралай Ізімбергенова қонақтарды таныстырып өткеннен кейін, мекеме директоры Нұрлан Мусаев қонақтарға осы ұсталық өнерді дамытып, дүние жүзі қызығарлық деңгейге көтергендері үшін және өз қолдарынан шыққан киелі бұйымдарды Маңғыстау жұртшылығына ұсынғандары үшін алғысын айтты. Содан соң мекеме директоры Н.Мусаев пен темірші ұста М.Құлменов көрмені ашу рәсімін жасап, келушілер көрме залына қойылған бұйымдарды тамашалады.

Көрмеге кіреукелі дулыға, айбалта, найза, шоқпар, гүрзі, сақетер, құстұмсық, садақ, қанжар,қалқан, жеңсе сияқты көптеген қазақтың қарулары, сонымен бірге бүркітшілердің томаға, балдақ, тұғыр, жемқалта, биялай сияқты асай-мүсейлері қойылған.

Көрмеге қойылған бұйымдарды таныстырып, келушілердің көптеген сұрақтарына жауап берген Махмут шебер өнер колледжінің қолөнер шеберлігіне ұмтылып жүрген жастарына атадан қалған салтқа сәйкес (бармақтарын ескі төстің үстіне қойып тұрып, балғасын бармақтарына тигізіп) батасын берді. Шара соңынан келушілер көрмеден алған әсерлерімен, пікірлерімен бөлісті.